मुंबई : क्विकहील टेक्नॉलॉजीज लिमिटेडला ‘डीएससीआय एक्सलन्स अॅवॉर्ड २०१९’मध्ये नासकॉमच्या डेटा सिक्युरिटी काउन्सिल ऑफ इंडियाद्वारे (डीएससीआय) ‘सायबर सिक्युरिटी प्रॉडक्ट पायोनियर इन इंडिया’ पुरस्काराने सन्मानित करण्यात आले आहे.
या सन्मानाने क्षेत्रातील आघाडीची सायबर सुरक्षा कंपनी म्हणून ‘क्विकहील’चे स्थान अधिक बळकट झाले आहे. ‘क्विकहील’ला मिळालेल्या या सन्मानाने आयटी सुरक्षा आणि डेटा प्रोटेक्शन सोल्युशन्स प्रदान करणारी आघाडीची कंपनी म्हणून त्यांची २५हून अधिक वर्षांची उत्कृष्ट कारकिर्द अधोरेखित झाली आहे.
क्विकहील टेक्नॉलॉजीज लिमिटेडचे व्यवस्थापकीय संचालक आणि मुख्य कार्यकारी अधिकारी डॉ. कैलाश काटकर म्हणाले, ‘अगदी स्थापनेपासून ‘क्विकहील’ निरंतर इनोव्हेशनमार्फत डिजिटल जगाला सुरक्षित करण्याबाबत वचनबद्ध राहिली आहे. हे ध्येय साध्य करण्यासाठी आम्ही नेहमीच नाविन्यपूर्ण उत्पादने आणली आहेत. ‘डीएससीआय’ आणि ‘नासकॉम’ यांसारख्या सर्वोच्च संस्थांकडून सायबर सुरक्षा आद्यप्रवर्तक अशी मान्यता मिळणे ही आमच्यासाठी अभिमानाची आणि प्रेरणादायी बाब आहे.’
‘डीएससीआय’ ही नासकॉमद्वारे उभारण्यात आलेली संस्था भारतात सायबर सुरक्षा व गोपनीयता या बाबत उत्कृष्ट पद्धती, मानके व उपक्रम दाखल करून सायबर क्षेत्रास सुरक्षित आणि विश्वासार्ह बनविण्यासाठी कार्यरत आहे. ‘डीएससीआय एक्सलन्स’ पुरस्कार डिजिटल धोक्यांवर उपाययोजना करणाऱ्या, लवचिकता निर्माण करणाऱ्या व व्यवसायासाठी सुरक्षित व सकारात्मक वातावरण निर्माण करणाऱ्या सायबर सुरक्षा कंपन्या, व्यक्ती, कॉर्पोरेट संस्था यांना दिले जातात.